Polisi Cydraddoldeb, Amrywiaeth a Chynhwysiant

Cyflwyniad

Fel is-gwmni dan berchnogaeth lwyr Prifysgol Bangor, mae’r polisi hwn yn cyd-fynd ag ymrwymiad hirsefydlog y Brifysgol i gydraddoldeb ac amrywiaeth.

Cenhadaeth M-SParc yw “tanio uchelgais ac arloesedd i bweru Cymru gynaliadwy”. Ni ellir cyflawni hyn heb ymrwymo’n llawn i’n cyfrifoldebau i gyflawni dyletswyddau cyffredinol Deddf Cydraddoldeb 2010 a’r dyletswyddau sy’n benodol i Gymru – ymrwymo i amgylchedd dwyieithog a deall pwysigrwydd treftadaeth ddiwylliannol Cymru.

Ein nod yw darparu amgylchedd a phrofiad cynhwysol i staff, tenantiaid ac ymwelwyr/rhanddeiliaid sy’n cydnabod ac yn gwerthfawrogi gwahaniaethau pobl ac sy’n adeiladu ar y cryfderau mae’r gwahaniaethau hynny yn eu rhoi i M-SParc o ran manteisio i’r eithaf ar botensial, gan sicrhau bod pawb yn cael eu gwerthfawrogi a’u cynnwys mewn penderfyniadau a fydd yn arwain at gyflawni’r canlyniad gorau yn gymdeithasol, yn amgylcheddol ac yn economaidd.

Mae’r polisi hwn yn berthnasol i

• Yr holl staff a gyflogir gan M-SParc

• Yr holl internïaid, myfyrwyr, prentisiaid a chyfranogwyr yn rhaglenni M-SParc.

• Holl ymwelwyr a defnyddwyr mannau cymunedol a/neu fannau cyffredin adeilad M-SParc (boed hynny yn safleoedd Gaerwen, Ar y Lôn ac ati) a/neu pan fyddant allan ar leoliad yn cynnal digwyddiadau (ysgolion/colegau/y gymuned/Eisteddfod ac ati)

Disgwylir i fusnesau sy’n denantiaid gynnal egwyddorion y polisi hwn yn eu sefydliadau eu hunain.

Pwrpas

Pwrpas y polisi hwn yw:

• Sicrhau cydymffurfiaeth â’r ddeddfwriaeth cydraddoldeb berthnasol a safonau’r diwydiant

• Chwalu’r rhwystrau sy’n atal pobl rhag cymryd rhan a chreu cyfle cyfartal

• Hyrwyddo diwylliant cynhwysol ar draws gweithgareddau M-SParc

• Cefnogi piblinellau talent amrywiol yng ngwaith M-SParc

• Annog arferion cynhwysol ymysg yr holl sefydliadau a phartneriaid sy’n denantiaid.

Mae M-SParc hefyd yn ceisio cyflawni gofynion Dyletswydd Cydraddoldeb y Sector Cyhoeddus, sef:

• Dileu gwahaniaethu, aflonyddu ac erledigaeth anghyfreithlon, ac unrhyw ymddygiad arall sydd wedi’i wahardd dan y Ddeddf

• Datblygu cyfle cyfartal rhwng pobl sy’n rhannu nodweddion a’r rheini nad ydynt yn rhannu nodweddion

• Meithrin perthynas dda rhwng pobl sy’n rhannu nodweddion a’r rheini nad ydynt yn rhannu nodweddion.

Cydraddoldeb

Rydym yn ymrwymo i sicrhau na fydd unigolion yn cael eu gwahaniaethu ar sail:

• Oedran

• Anabledd

• Hunaniaeth o ran rhywedd neu fynegiant rhywedd

• Rhyw

• Beichiogrwydd neu famolaeth

• Hil, ethnigrwydd neu gefndir diwylliannol

• Crefydd neu gred

• Cyfeiriadedd rhywiol

• Priodas neu bartneriaeth sifil

• Cefndir economaidd-gymdeithasol

• Unrhyw nodwedd arall a warchodir gan y gyfraith

Yn ogystal â’r ddyletswydd gyffredinol, mae Dyletswyddau Cydraddoldeb penodol yn y Sector Cyhoeddus yng Nghymru sydd wedi’u nodi yn Rheoliadau Deddf Cydraddoldeb (Dyletswyddau Statudol) (Cymru) 2011. Cafodd y dyletswyddau cydraddoldeb penodol yng Nghymru eu harwain gan bedair egwyddor:

1. defnyddio tystiolaeth,
2. ymgynghori a chynnwys ,
3. tryloywder,
4. arweinyddiaeth.

Er mwyn cyflawni’r dyletswyddau penodol, rhaid i sefydliadau’r sector cyhoeddus yng Nghymru, gan gynnwys M-SParc fel is-gwmni i Brifysgol Bangor wneud y canlynol:

• Creu sylfaen dystiolaeth sy’n berthnasol i’w swyddogaethau

• Ymgysylltu â staff

• Asesu effaith polisïau ac arferion

• Datblygu amcanion gwahaniaeth cyflog

• Datblygu amcanion cydraddoldeb

• Adrodd ar gydymffurfiaeth â’r ddyletswydd

• Ymgorffori cydraddoldeb ym mhob swyddogaeth

Mae trosolwg o weithgareddau a chynnydd M-SParc yn cael ei adrodd yn flynyddol i’r bwrdd sy’n mynd i’r afael â’r bwlch cyflog rhwng y rhywiau, cydbwysedd rhwng y rhywiau yn y gweithle yn ogystal ag amrywiaeth a chynhwysiant yn ein gwaith.

Amrywiaeth

Rydym yn gwerthfawrogi profiadau a safbwyntiau unigryw unigolion. Byddwn yn gwneud y canlynol:

• Annog piblinellau recriwtio amrywiol *bydd rhai rolau lle mae’r Gymraeg yn hanfodol, i eraill bydd y Gymraeg yn ddymunol

• Meithrin amgylcheddau lle gall timau rhyngddisgyblaethol gydweithio’n effeithiol.

• Hyrwyddo amrywiaeth mewn arweinyddiaeth, rhaglenni cyllido a digwyddiadau cymunedol/allgymorth.

Cynhwysiant

Rydym yn ymrwymo i’r canlynol:

• Darparu mynediad teg at gyfleusterau a chyfleoedd

• Sicrhau bod yr adeilad (Tanio, mannau gwaith a rennir, swyddfeydd, labordai, gweithdai, ystafelloedd cyfarfod, lleoliadau Ar y Lôn, digwyddiadau) yn hygyrch ac yn groesawgar

• Mynd ati i nodi a dileu rhwystrau systemig

• Annog arferion cyfathrebu a gwneud penderfyniadau cynhwysol.

Ein Cyfrifoldebau

Rhaid i bawb a gyflogir gan M-SParc neu wirfoddolwyr (fel aelodau bwrdd neu leoliadau gwaith di-dâl) ddeall eu cyfrifoldebau o ran cefnogi cydraddoldeb.

Mae gan bawb sy’n aelod o dîm M-SParc gyfrifoldeb i sicrhau bod ein hymrwymiadau, ein cenhadaeth a’n gwerthoedd yn cael eu cymhwyso a’u hyrwyddo. Efallai y bydd gan wahanol grwpiau o staff gyfrifoldebau gwahanol ac mae rhai o’r rhain wedi’u nodi isod:

Rhaid i bob aelod o staff wneud y pethau hyn:

• Trin pob aelod o gymuned M-SParc ag urddas a pharchu eu hawliau a’u credoau

• Ymateb yn gadarnhaol ac yn gynhwysol i wahaniaethau unigol

• Herio neu roi gwybod am achosion o wahaniaethu neu fwlio

• Cymryd rhan mewn hyfforddiant EDI lle bo angen.

Dylai rheolwyr llinell wneud yr uchod i gyd, a:

• Sicrhau bod Ymrwymiad Cydraddoldeb a Chynllun Gweithredu Strategol Prifysgol Bangor yn cael ei gyfleu i staff newydd

• Dosbarthu gwybodaeth i sicrhau bod staff yn ymwybodol o’u cyfrifoldebau

• Sicrhau bod yr holl staff yn eich tîm wedi cael yr hyfforddiant cydraddoldeb ac amrywiaeth perthnasol

• Cefnogi anghenion ac amgylchiadau unigol staff er mwyn iddynt allu perfformio’n effeithiol.

Hyfforddiant Cydraddoldeb

Mae hyfforddiant i staff ar gydraddoldeb ac amrywiaeth yn un o amcanion allweddol M-SParc. Fel rhan o broses gynefino gweithiwr newydd:

• Rhaid i staff gwblhau’r modiwl Cydraddoldeb a’r modiwl Rhagfarn Ddiarwybod ar-lein fel rhan o’u cyfnod prawf (a ddarperir gan Brifysgol Bangor)

• Rhaid i bob rheolwr gwblhau’r gweithdy Cydraddoldeb i Reolwyr (a ddarperir gan Brifysgol Bangor).

Recriwtio, Cyfleoedd a Chynnydd

Byddwn yn gwneud y canlynol:

• Defnyddio prosesau recriwtio teg a thryloyw sy’n ymwybodol o ragfarn

• Annog ceisiadau gan grwpiau sy’n cael eu tangynrychioli

• Darparu mynediad cyfartal at Gynlluniau Datblygu Proffesiynol (llwybrau hyfforddi, mentora ac arwain)

• Hysbysebu swyddi a chyfleoedd yn eang ac yn hygyrch.

Hygyrchedd ac Addasiadau Rhesymol

Rydym yn ymrwymo i sicrhau cyfleusterau hygyrch gan gynnwys mynedfeydd, labordai, gweithdai, swyddfeydd, mannau digwyddiadau a llwyfannau digidol. Darperir addasiadau rhesymol ar gyfer:

• Ymgeiswyr am Swyddi

• Gweithwyr

• Tenantiaid

• Ymwelwyr

Mae hyn yn cynnwys addasiadau ffisegol, technolegol neu weithdrefnol.